Република Македонија, ги исполни критериумите за членство во Алијансата, но ќе се приклучи кога ќе и се овозможи тоа да го направи на достоинствен начин, рекол денеска министерот за надворешни работи Антонио Милошоски во делот од своето обраќање на состанокот на земјите на Јадранската група што се одржа во Хелсинки на маргините на 16-тата сесија на Министерскиот совет на ОБСЕ.

Тој воедно изразил задоволство од денешното официјално приклучувањето на БиХ и Црна Гора во Јадранската група, како и подготвеност за поддршка на двете земји кои ги очекуваат своите НАТО акциски планови за членство, објави Владата на својата интернет страница.

Придружувањето на двете нови членки се случува во време кога Македонија претседава со Јадранската повелба.

Значењето на Јадранската повелба го истакнале министрите на сите земји од групата во проширен состав кои го потпишаа документот, како и помошникот на државниот секретар на САД Даниел Фрид кој истакнал дека две земји, Хрватска и Албанија, добија покана за членство во НАТО и притоа изразил надеж дека спорот со името ќе биде брзо решен и оти и Македонија ќе се приклучи.

На состанокот во Хелсинки присуствуваше и Србија во својство на земја набљудувач, како и земјите поддржувачи на иницијативата Адријатик-Балтик-Атлантик, Латвија, Литванија и Естонија.

Министерот за надворешни работи Антонио Милошоски попладнево ќе има обраќање на 16-тата сесија на Министерскиот совет на ОБСЕ, како и повеќе билатерални средби меѓу кои и со Даниел Фрид.

Автор на веста: Нетпрес
Објавена на 04.12.2008 15:47:46