Медиумската организација на Југоисточна Европа (СЕЕМО) во писмо до грчкиот премиер Костас Караманлис изрази загриженост по одбивањето на грчките власти да дозволат влез на македонски новинари во Грција.СЕЕМО го осуди таквиот потег на грчките власти, нагласувајќи дека Грција е членка на ЕУ, која треба да го применува правото на слобода на печатот, што е основа на демократијата.„Одлуките како оваа ги оневозможуваат новинарите да работат слободно и да имаат слободен тек на информациите“, се вели во реакцијата на СЕЕМО.

Според информациите што ги добил СЕЕМО, проблеми на границата имале новинарите од А1 и А2 ТВ, на „Форум“ и на „Македонско сонце“.Меѓутоа Канцеларијата за врски на Грција во Скопје вчера ги демантира ваквите наводи. Наспроти овие информации, амбасадорката Александра Пападопулу преку соопштение соопшти дека Канцеларијата посредувала во вадењето визи за новинарите и тоа во скратена процедура.

Таа вели дека граничниот проблем настанал поради тоа што новинарските екипи ги немале потребните документи за нивната опрема како што налагаат грчките закони. Но, и тој проблем бил брзо решен, а потоа сите екипи влегле со опремата во Грција за да го следат настанот во Овчарани.

Автор на веста: Нетпрес
Објавена на 23.07.2008 09:04:26