Колку се заштедува со новите згради од Скопје 2014?

Освен естетската, проектите кои се дел од Скопје 2014 година имаат и функционална вредност. Особено тоа доаѓа до израз доколку се пресметаат заштедите кои државата ќе ги направи по основ на кирии со изградбата на новите згради каде ќе се сместат повеќе државни институции, пари кои години наназад се плаќаа на приватни газди.

Упатените тврдат дека комбинаториките кои биле правени во минатото во поглед каде и во чии простории да бидат сместени државните институции криеле вносен бизнис за поединци. Тоа го покажуваат податоците.

Така, на пример, дојдовме до информации дека Министерството за земјоделство, шумарство и  водостопансто кое до пред неколку недели функционераше на пет различни локации по основ на кирии годишно исплаќало неверојатни 381.700 евра.  Откако е формирано самото Министерство тоа функционира во туѓи простории.

Уште поинтересен е податокот дека голем дел од овие пари години наназад оделе на сметката на Комерцијална банка која е сопственик на некои од тие простории каде било сместено Министерството. Од 8-ми септември годинава Министерството за земјоделство беше сместено во новата зграда.

Новиот објект има корисна површина од околу девет илјади метри квадратни и во неговата изградба се вложени 4,3 милиони евра, што значи дека за околу 11 години само по основ на заштеда на кирии целосно ќе се исплати целата административна зграда. За 10 години државата ќе заштеди цели 3.381.700 евра пари на граѓаните кои би отишле како непродуктивни трошоци по основ на кирии.

Во објектот ќе се сместат вкупно 467 административци, од кои 366 вработени во Министерството и 101 од Агенцијата за храна и ветеринарство.  Со преселувањето на сите сектори и органи на единствена локација, се очекува да се зајакне административниот и управувачкиот капацитет на институцијата и да се обезбедат услови за поефикасно и поквалитетно функционирање.



Наскоро нови простории треба да добијат и Министерството за надворешни работи, Агенцијата за електронски комуникации, Финаниската полиција, Јавното обвинистелство.

Од овие само АЕК за кирија годишно плаќа 4,6 милиони денари. Во рамките на проектот “Скопје 2014“ предивдено е секоја од оваа институција да добие своја зграда кои веќе се во завршна фаза од изградба на кејот на реката Вардар.