ЕКОНОМИЈА

Како Македонија, за разлика од Хрватска, привлече капитал

16.09.2012 - 13:53:42

Го расчистија катастарот, даваат дозволи за еден ден, Македонија е 22-ра на местото земји според бројот на инвестиции, имаат најниски даноци и странски долг од само две милијарди евра, пишува денеска хрватски “24 Сата“, во текстот под наслов “Како Македонија, за разлика од Хрватска, привлече капитал“.

Во споредбата што ја прави порталот кој констатира дека од најавите од хрватскиот премиер Зоран Милановиќ “нема да има ништо", се додава дека кај нив треба да минат години додека странците ја добијат потребната документација за реализација на проектите, додека во Македонија тоа се решава за еден ден.

Токму Македонија, иако со најголема стапка на невработеност во регионот, успеа да дотурка до една од најмалку задолжените земји во Европа. Иако Македонците живеат потешко од Хрватите, имаат цела серија макроекономски показатели кои ги издигнуваат над Хрватска, вели авторката на текстот во “24 Сата“.

“За четири години ги расчистивме катастарските книги, и со закони им овозможивме на странските инвеститори во рок од еден ден да ги отворат филијалите на своите компании во нашата земја и без тешкотии да работат на проектите. Токму тоа е причината поради тоа што Македонија денес е 22-ра земја на листата земји во која најмногу вложуваат странците. Имаме и најниски даноци во Европа, каде капиталната и лична добивка се одданочуваат по единствена стапка од 10 отсто", вели за весникот неименуван, како што велат, реномиран македонски дипломат.

Третина од работоспособното население во Македонија не работи, но решението на тој проблем го гледаат во странските инвестиции. Со два милиона население, пишува “24 Сата“, Македонија својот надворешен долг го сведе на само две милијарди евра.

Според хрватското министерство за финансии, Македонија во 2011 година извезла стоки во Хрватска во вредност од 133 милиони долари, при што се констатира дека секоја година оваа сума се зголемува.

автор: Нетпрес